鄭文雅爆老公虞哲輝帶一支花上門示愛 入屋後勁尷尬：成屋都係花
撰文：吳子生
出版：更新：
鄭文雅今晚（8/2）現身西九文化區戲曲中心大劇院出席粵劇新「胡不歸」第二場。鄭文雅和老公虞哲輝結婚32年，婚姻生活甜蜜至今。被問到2月14日生日既是情人節會同老公點過？鄭文雅表示：「其實好多年都冇大事慶祝搞生日，因為本身屋企有老人家同住，聽師傅講同老人家住，就唔好高調搞生日，怕會沖老人家，變咗對佢哋唔好。咁所以我都係好低調咁同老公食吓飯咁。（每年生日老公會送驚喜？）佢每年都會買禮物氹我開心，不過有時我嫌佢買啲禮物唔啱我心水，就不如自己買，買完佢找數，哈哈！」
鄭文雅透露老公虞哲輝憑一支花成功將她追到手。（葉志明攝）
被問到情人節老公會否會送花？鄭文雅笑言：「其實我好鍾意鮮花嘅香味，所以屋企已經擺咗好多花喺度，如果佢送花俾我都會好開心。我好記得佢追我嘅時候，佢帶咗一支花上嚟我屋企，點知佢一入到嚟我屋企嘅時候，發現成屋都係花，佢即時好尷尬，想搵窿捐，但原來一支花就可以感動到我，變咗花係唔需要太多，一支就夠，就係嗰支花成功追我到手。」
鄭文雅今晚現身西九文化區戲曲中心大劇院出席粵劇新「胡不歸」第二場。（葉志明攝）