【專訪】Anjaylia變自由身新挑戰：最難係收數囉！
每年都有新人投入娛樂圈，很多青春少艾都夢想變成新聞報導中的男女主角，正所謂「長江後浪推前浪」，入行近十年的陳嘉寶（Anjaylia）和林皓霆（Charles）早已變成早一代的舊人，要繼續留在圈中打滾，單靠漂亮面孔並不足夠，惟有在重重難關中越戰越勇才是最佳的生存之道！
攝：符祥定
陳嘉寶（Anjaylia）和「任職」KOL（關鍵意見領袖，Key opinion leader）的好友林皓霆（Charles）這對「輕熟男女」近期合作出書《Behind the scene》，紀錄出道近十年的苦與樂，不是什麼大爆圈中秘密的書，而是分享鏡頭後的生活點滴。
提及娛樂圈，一般人總會覺得這是一個極度風光的地方，藝人化着零死角的妝容，穿上華麗的衣服，在鏡頭前揮一揮手，大方地回應記者的問題，那鏡頭後呢？「好多嘢都係靚靚靚靚，但其實好多時都今日唔知聽日事，都係一啲好虛無嘅嘢。」Anjaylia說。
「一分耕耘一分收穫」未必適合套用在藝人這個職業上，「無論幾大嘅星收入都唔會穩定。」Anjaylia接着說，「好多人會問我到底係做啲咩，出個Event靚靚賺好多錢喎，但又唔會知出Event之前，個半年我去咗拍戲、做武打訓練，48-50個鐘唔瞓覺不停咁拍嘢，仲要搏一舖，睇下依個角色得唔得人鍾意，先可以接到個一Event出。」每次接Event都會牽涉到好多人事，單是尋找一套出席活動的服飾，就可能花上兩個星期。
不安穩中冒險
在一個「輕熟」的尷尬年紀，不再是十八廿二，又未準備好長大，Anjaylia和Charles選擇了一份不穩定的工作。當年憑「邦民女」彈起的Anjaylia，除了轉戰公仔箱外，在今年決定離開舊公司，另覓新方向；而本來是模特兒的Charles大學畢業後，曾經做過Copywriter及自家品牌的創作總監，近年更加入KOL的行列。
唔係堅持唔走，又點會試到鐘意嘅嘢。
回復自由身的Anjaylia為何情願離開安穩的地方，不再續約？她笑說其實不斷在尋找合適的公司，「喺舊公司已經九個年頭，我會覺得係時候畀自己長大，就算幾好幾靚嘅溫室，你唔出去闖下，唔會茁壯成長，要不斷跌跌碰碰先有成長，19-20歲剛入大學個時想放棄㗎喇，唔係堅持，我點會搵到想做演員嘅夢想。」
至於Charles所從事的KOL是一個新的工種，比起藝人似乎更不穩定，到底這個職業是過眼雲煙，抑或可持續發展，都是Charles要想的問題，「大家會講話，可能過兩年就冇喇，會有好多懷疑，一去到迷惘就會覺得，不如返去做廣告公司啦，真係返去一個踏實嘅環境、有安全嘅感覺，但我就係唔肯放棄。」
談到脫離Model公司後，懂得自理是相當重要，傾生意、約化妝、借衫全部一腳踢，Charles直言，「我做Freelance其實可以好Hea，鍾意日日瞓到12點都可以，但我會Keep住早睡早起，用早上嘅時間處理e-mail同啲客溝通。」
講到最大的麻煩，兩人笑言其實是「追數」問題，以前有公司打理，收數無難度，但自由身的人沒有大公司撐腰就另當別論了，「面對追數問題都幾吃力，自己咁努力，但畀人冷待Payment係幾激氣，一開始係唔敢追數，驚得罪個客，慢慢你會覺得，只要係有禮貌，都係工作一部分。」
「都唔細啦，搵返份穩定啲職業啦，你都係腳踏實地啦」好多依啲聲音，未有成績前真係好浮動，好冇信心。
「花瓶」之不幸
Charles坦言很早認清自己想要什麼，「但男仔25歲後都仲係做唔穩定嘅行業，有啲人會潑冷水，『都唔細啦，搵返份穩定啲職業啦，你都係腳踏實地啦』好多依啲聲音，未有成績前真係好浮動，好冇信心。」
遇到難題的時候總會有放棄的想法，Anjaylia自言17歲那年，因為「邦民女」廣告而受到關注，受寵若驚的程度令自己幾乎想放棄，「初初做兼職模特兒係想賺下學費，但個時突然間有人識我、街上有人認得我，個個好大轉變令我想放棄，因為我唔係由細到大立志入行嘅人，係無心插柳，個時我得十幾歲，覺得我冇Plan過依啲嘢。」
面對大眾的「負皮」，可以調整的就只有自己的心態，Anjaylia表示在《殭》飾演何月時，見識過網民「一秒變臉」，該網民本來在留言中大讚何月演技自然，但發現是Anjaylia飾演時即刻改口「哦，啫係Model啦，都係造作，唔知做咩嘢。」Anjaylia坦言有時網民的留言是不理性的，又或者只是一個發洩，「但我面對唔到佢哋，隔住咁多個IP Address，只可以面對自己內心，我有一段時間係唔去睇，後尾叫家人朋友幫我過濾，搵啲有建設性嘅留言，有啲人話我把聲太尖，我會學識搵返自己把聲做戲，但有啲人話我洗衫板，咁你話畀我聽我都唔會走去隆胸架啦，睇完都冇用㗎！」
我第一日去雜誌社做Intern，老細問我係咪嚟做Model，以為我係「花樽」唔識做嘢，到後尾都覺得我OK。
談到是否外表的優勢令人忽略了其他方面的表現？兩人笑言新書找了前老闆寫序，兩篇序都不約而同講到初初見到他們，都以為是「花瓶」，不會做實事，後來才發現工作表現不錯，Anjaylia直言，「我係靚，但唔係靚到盡個隻吖嗎，靚到盡個隻就話唔緊要啫……如果有人因為我依樣嘢而有偏見，我會覺得係我做得未夠好囉。」
Make up for Anjaylia: Meegan @ Bridal Corner
Hair for Anjaylia: Zap @Queens Private I salon
Hair for Charles: Tony @Kr Plus
Wardrobe: Harvey Nichols
Venue: Cook Town