【盜錄犯法㗎】許廷鏗戲院偷拍放上網：人人都有錯
撰文：洪曉璇
出版：更新：
「成個電影業都俾你搞彎晒啦！」大家都知戲院係嚴禁攜帶拍攝器材，喺戲院內影相拍片更加係違法行為。不過呢個世代人人去到邊都要影相Check in放上網呃Like，有時犯咗法都唔知。許廷鏗早兩日入戲院睇近期大熱嘅韓國電影《與神同行》，仲影低其中一幕放上網，咁咪即係盜錄﹗許廷鏗接受香港01訪問時就反高潮話：「自己就無喺戲院入面影過。」
許廷鏗上載呢一張相，好明顯見到係喺戲院中影大銀幕，盜錄行為被網友鬧爆，他即時已刪Post都已被cap低。(許廷鏗IG)
每次睇戲大家都見到提示短片，未經授權攜帶攝錄器材進入戲院屬違法，最高刑罰係監禁3個月同罰款港幣5萬元。不過許廷鏗唔知係咪睇戲睇得太開心，居然上載一張《與神同行》嘅相，而且仲明顯係影緊戲院大銀幕！Alfred寫上留言話：「人人都有錯，重點在於你有沒有勇氣，在還來得及的時候，面對自己的『後悔』。」仲加上Hashtag「原諒我忍唔住影咗一張」。
許廷鏗個留言，係睇戲之後嘅感受，不過套用落佢盜錄行為，又好似幾啱用喎。(許廷鏗IG)
再好睇都唔會容許戲院盜錄，亦唔會係明知唔啱加個Hashtag就會原諒，仲要放埋上社交網站添，大批網友都留言鬧Alfred，佢亦急急刪Post，改用劇照重新上載，留言都係一樣，不過Hashtag就改為「都係po翻劇照好喇」許廷鏗接受香港01訪問時就反高潮話：「我覺得其中一幕好感動，所以上網搵劇照，但自己就無喺戲院入面影過。」 有人Cap低咗又寫「原諒我忍唔住影咗一張」，羅生門事件？
睇返佢嘅社交網站，許廷鏗同時下年青人一樣，都幾鍾意去到邊影到邊然後放上網。(許廷鏗Facebook)