【賤民20】《春嬌》Brenda客串　喜見王宗堯著小背心

大家仲記唔記得ViuTv劇集《賤民20》首集廁所大爆炸一幕？一眾主角死無全屍，完全顛覆一貫劇集玩法。話說拍呢場戲嘅時候，吳海昕需要著上學生妹校服，單拖去公廁墮胎，當佢培養情緒拍攝時，陳炳銓同王宗堯就聯同劇組突然撲出向Sofiee開香檳慶祝煞科，嚇到佢花容失色：「原想你地冇拍到㗎？我個剎那真係好驚唔見晒啲人！」其後更追住王宗堯和陳炳銓噴香檳。拍足幾個月，唔捨得就一定喇，吳海昕表示：「自己完全投入個角色，平時我好斯文㗎，點知拍呢個戲就要好野性！（如果原班人馬再拍續集，會參與嗎？）唔好拍愛情戲，我做唔到落去！平時對住佢地呼呼喝喝，真係唔得！」

煞科日眾人情緒高漲，陳炳銓更為幕後同事慶祝生日，他表示現忙於後期製作，希望作品有破格的表現：「我話晒都有做製作個部分，依家個心都去晒後期度，希望大家有好嘢睇啦！唔習慣係起身終於冇通告要拍，而係返公司跟後前剪接囉！」

而於《志明與春嬌》飾演Brenda嘅林兆霞，就話煞科終於鬆一口氣，因為拍攝期間不停下雨拖慢進度：「不過落雨有落雨好，因為悶熱天氣逼王宗堯成日著住小背心，又濕濕地有點汗，夠晒Sexy！我真係有朋友要探班，我話咪搞阻住我獨霸男神風采！」