被鮑姐爆單文柔戀情係真？ 陳展鵬：大家唔好扭曲佢個意思
撰文：溫菁莉
出版：更新：
陳展鵬話唔想再答佢同單文柔嘅緋聞。（溫菁莉攝）
將於明晚首播嘅TVB重頭劇《同盟》，今午一眾演員出席宣傳活動時就欠缺兩位女主角胡定欣同姚子羚，宣傳重任當然落在陳展鵬身上。去年《城寨英雄》播出嘅時候，全城都估邊個係「Final Boss」。而陳展鵬就話今次《同盟》都有final boss出現，相信屆時又掀起一股熱潮。
陳展鵬就大讚鮑姐有義氣！（溫菁莉攝）
講到今次同鮑姐合作，陳展鵬就大讚對方有義氣，「我知道公司好耐之前已經想邀請鮑姐拍劇，大家都知道佢係亞視好耐，近呢兩年亞視無做，佢先過嚟TVB。」佢仲話對方已經10年無拍過劇，觀眾可以再睇返係喜事嚟。提到早前鮑姐接受訪問時就誤會佢同緋聞女友單文柔嘅戀情係真，陳展鵬就話鮑姐事後都有打返俾自己解釋，「都無怪佢，因為好多時候雜誌寫嘅內容都唔係真，誤導咗其他人。但其實我嗰陣同佢講，如果我有女朋友就帶俾你睇。因為佢簡直係睇住我大，都想我開心快樂。所以大家唔好扭曲佢個意思。」佢之後仲話傳媒經常問佢同單文柔嘅緋聞，已經答到唔想再答喎。
而監製文偉鴻就表示劇集想宣揚係孝義，「有好多人同我講呢題材好老土，但我覺得沒有老不老土，因為本身係普世價值，要睇下用咩包裝。我就揀咗年青人比較容易入口嘅，帶有特工同動作元素拍攝。」而佢對今次劇集亦好上心，全部預告片都係自己剪，仲透露話睇好今次陳展鵬同胡定欣係《同盟》中嘅表現，可以再問鼎電視帝視后咁話。