【同盟】陳山聰當現任女友係家人 憶同超雲拍拖：當人生上左一課
相信不少人現在提到陳山聰，不得不提當年他與何家千金何超雲的戀情。二人分手接近4年，但話題至今仍然離不開，一段感情竟遭到四方八面的抨擊，更被網友封做「世紀賤男」。當事人陳山聰直言，「就當人生上左一課，呢一課係我自己揀。如果我無上呢一課，可能現在嘅陳山聰唔會係咁。」專訪中，陳山聰講出「時間會改變一切」這句話多次，看來時間對他而言， 無論係愛情定友情都有好大影響。
攝影：黃國立
場地：PorterHouse
與超雲拍拖拍到全港都知，雖然最終戀情無疾而終，陳山聰表示事情已經過去，當下才是最重要，「人生係一種經歷，唔好因為一次咁而去低估自己，我覺得現在可以繼續留在娛樂圈，係用行動同心，俾觀眾或者身邊朋友感受究竟而家嘅陳山聰係點。」與超雲分手後兩個月後，陳山聰透露有次在街上見到曾志偉，「佢一見到我就問仲想唔想拍劇？就係因為咁，之後見到珍姐、樂小姐到添哥。佢地對我嘅好，無言感激，我永遠記得。」佢透露添哥曾向他講過一番說話，「只要你一返黎，一定俾部劇你拍。點知我一返到TVB第一部劇，就係拍添哥。」
而現任女友Apple都知道男友曾與何家千金拍拖，陳山聰直言，「佢當然知喇，點會唔知，全香港嘅人都知。」他指曾向女友交代過與超雲拍拖嘅事，「佢當時同我講：『咁又點呀？唔關我事，呢啲係你嘅過去。』呢嗰係俾左好大嘅強心針我。」陳山聰透露當年剛與Apple拍拖時，是對方要求唔公開戀情，「佢話我唔想影響到你。(幾時結婚？)當然都有諗過，我已經當佢係家人嘅一部分。而我地亦有默契，佢想我係最好嘅事業拼搏 。」他表示現實啲講就係想係呢一兩年快啲揾多啲錢，「做男人當然希望日後嘅生活可以安穩，呢嗰都係我對佢嘅承諾。」而他現時一唔洗開工就會變住家男，「我唔洗開戲嘅時候就會買餸煮飯，相反佢放假嘅時候我開工佢都會咁做，我從來無諗過會有呢種生活 。」
愛情咁完滿，原來今年仲有件事最令到陳山聰值得開心，就是與好友伍詠薇恢復友誼。事緣2011年陳山聰與好友慶祝生日，如果遊戲輸就要打俾好友提絕交，佢就決定打俾好友伍詠薇，點知最後就玩出火，因為伍姑娘真係答應絕交。時隔6年，二人終在4月於日本一吻解千仇，陳山聰指當時見返面就好似情侶分手再見面復合，「呢嗰係我2017年最大嘅禮物，其實係呢幾年裏面，伍姑娘係我唯一嘅心結。更加證明了原來時間係可以改變一切，只要大家嘅情仍然係度。」
陳山聰指在去年其實與伍姑娘在楊怡嘅婚禮有見過面，咁點解當時唔去嘗試與對方破冰？他說，「就係timing，有好多嘢真係要講緣分。」提到身為二人嘅共同好友陳敏之有無嘗試為他們做和事佬時，山聰笑言敏之有向其探口風，「但我覺得有些事不能強求，要靠我地兩個。如果無日本之旅，可能我地嘅關係繼續好似以前咁。」
他透露4月與女友及哥哥一齊去日本旅行，預備登機時剛巧遇到伍姑娘同老公練海棠，「當時大家有say hi，原來佢地都去日本。去到日本我就覺得不如試下約出嚟食飯，就send 短信俾佢地。點知最後竟然伍姑娘覆我，話當然要一齊食。」陳山聰直言好珍惜現在嘅一切無論是愛情還是友情，「如果呢份情唔係度，強求都強求唔到，無諗過會係咁樣發生。」問到他有無一刻覺得自己嘅玩笑過分？山聰思考了一陣才說，「呢嗰就係一個過去，自己知道係有錯，但發生左補救唔到，唯有等時間。結果好與壞就係視乎自己點樣嘅心態。咁我相信佢見我嘅心態，同埋我呢幾年嘅改變同努力，令佢更加覺得呢嗰細佬係時候返佢身邊。」
結果二人當晚在日本一見面，一個擁抱再加一個kiss，就化解咁多年嘅誤會，「嗰種感覺形容唔到，當日我地講左好多心底話，大家都知伍姑娘係性情中人，都覺得過去發生過嘅事就讓它過去，當下繼續快樂最重要。呢份友誼比之前更深，我同佢可以係話『我唔會再落呢班車』。」