【香港小姐2017．採訪手記】港姐呢個挑戰 果然唔係個個挑得起
去完呢6日港姐外景拍攝之後，小記得到的體驗係，有得揀一定唔會選港姐……
出發之前，身邊同事、朋友不停為小記妹妹進行腦補，傳聞「地獄外景訓練營」、「幾日冇覺好瞓」、「有港姐嘅存在就有小圈子」、「冇啖好食」、「有保姆冇自由」等等，加埋網友每年都會對港姐評頭品足，「質素每況愈下是常識吧」、「真係唔得囉」⋯總之有頭髮邊個想做港姐？聽完覺得參加港姐就好似受罪咁，增廣見聞？不了。於是這6日的外景拍攝採訪，就親身驗證呢啲傳聞是否屬實！
6日裡面，港姐真係冇啖好食。最記得第一日夜晚，成班記者行家開開心心齊齊烚下烚下，麻辣湯底、牛奶湯底好鬼繽紛。一場嚟到台灣，梗係有幾肥食幾肥喇，唔係點清湯底扮健康呀？然後一班餓鬼道轉世的行家就食得好滋味兼好瘋狂。至於一班港姐呢？雖然身處同一空間，不過就清一色點清湯底，跟湯附送一塊大約5cm昆布，食嘅就係白菜白肉……天國同地獄，只係一檯之隔！
還有，拍攝外景時，見到17歲Mandy明明手上拎住一碗極邪惡嘅鹵味併盤，放break time嗰時明明有得「試」下味，但佢偏偏要拎部手機影低當食咗，真係世上最遙遠嘅距離係有得睇冇得食！就算問Mandy「你辛苦嗎？」佢都會笑住：「唔會啊，我都有食水果」、「仲可以再瘦啲㗎！」、「瘦咗好開心呀！多謝！」……答案係公式，不過已經完全感受到嗰份無奈。冇計喇，為咗減肥要去到勁盡，唔通著泳裝多舊肉同大家開心share咩！
至於冇覺好瞓，呢個就梗㗎喇。晨早六點起身，化好晒妝set好頭、八點拎住TVBuddy行李箱出嚟見記者。飛到台灣，火速settle down，之後就chur住拍攝，撞正打風，天氣又熱又落雨，日日好似40幾度咁，真係人都癲。去到最後一日，見住佳麗大熱之一Kelly隻眼都係充滿紅筋，原來每晚最盡瞓得五個鐘，仲要笑住講：「唔辛苦呀⋯」真係有苦自己知，如果係一般港女，可能已經嗌晒救命，所以港女同港姐都係一線之差㗎咋！
三個女人一個墟，女人多就變是非多，不過呢6日入面唔係好睇到小圈子、有是非呢件事。就算有好幾位佳麗外貌有呢個嫌疑，但就現場所見，又唔係好覺。就好似佢哋極度官腔回答記者問題所講：「今次學到好多嘢，同佳麗增進咗唔少友誼。」好行，但真係冇，喺鏡頭後攰樣你見到佢哋個攰樣，就只今次旅程不是開玩笑！
其實諗諗下，有好多人都話「而家啲90後真係唔捱得」，呢度12位港姐，個個都係90後，差唔多個個都係大學生，都要特登參加港姐、chur爆做訓練做到眼紅紅。你可能話：「車！選得港姐預咗喇！」但係你估好易？如果係你，可能要爆瘡、化妝唔上粉，多幾層眼袋，又制唔制？話晒廿幾歲仲有大把世界喎，記者就冇呢個勇氣喇，所以話唔捱得都唔好參加港姐，記住唔好再話人「做人不要太港姐」喇，港姐隨時意志力高你幾倍。