【港姐2017】Big Big Channel直播淘汰港姐 4號劉穎敏台灣被out
撰文：溫菁莉
出版：更新：
TVB一年一度嘅《香港小姐競選2017》上星期一班港姐就飛到台北拍攝外景，期間仲遇上颱風吹襲，都咪話唔黑仔！話咁快，今日就已經回程返香港喇。但現實永遠都是殘酷的，因為TVB今年就係一班港姐回港前進行淘汰賽，唔洗擔心，只不過係淘汰一位姐。Big big Channel今日中午就已經預告會在下午5點至5點30進行淘汰賽直播，但直到下午5點20分先開始直播。過往TVB對於淘汰賽都好隆重其事，但今次就好似美中不足，因為風聲太大，完全聽唔到現場講咩。
Angela透露自己已經作最壞打算。
Angela今年22歲，職業係一位旅遊記者。
當宣佈完被淘汰嘅佳麗係Angela之後，其他佳麗即刻湧上前安慰佢。
而宣佈被淘汰嘅港姐重任就落在呢幾日與一班港姐拍攝外景嘅Mall姐宣萱身上，一開始Mall姐就劇集點名幾位佳麗叫佢地講下自己嘅不足，但基於現場風聲太大，所以好難聽清楚宣萱對港姐嘅評語，但好彩都聽到被淘汰嘅係今年22歲嘅4號劉穎敏（Angela），節目直播一完成班佳麗就湧上前安慰Angela，期間仲有佳麗泣不成聲，反而Angela好鎮定咁同大家講，「我好開心可以嚟呢度。」
其後，Angela接受直播訪問是表示，「到台灣幾天拍攝外景學到好多嘢去到台北學做戲同跳舞，我完全唔知自己都識做戲。參加港姐係我嘅夢想，去到呢度已經好滿足。」見佢咁easy-going，Angela透露知道今天會淘汰一位港姐前已作最壞打算，問到之後的去向，她說，「首先睇下TVB想點，我知道都會有其他機會，但我諗我會返英國繼續讀書，希望可以教書教小朋友。」最後她都表示今次好開心可以同一班女仔做好朋友。