【極限挑戰】黃宗澤北上綜藝大解放　冒雨濕身跳舞騎呢有乜所謂

內地真人騷《極限挑戰》早前來到香港進行拍攝，並請來重量級嘉賓孫紅雷、黄磊、羅志祥、曾志偉等人玩遊戲。除此之外，在香港拍攝，當然要搵返本地薑，這集就請來剛離開TVB，近期在大陸積極發展的黃宗澤，能夠同一班猛人同場，黃宗澤都特別落力，似乎都放低在香港型又Chok的形象，往搞笑路線進發，睇到香港fans都不敢相信這是大家熟悉的他！

黃宗澤一出場，他的亮點就是說得一口流利的普通話，而且他的口音完全聽不出是香港人，有饒舌之餘，仲講埋地道用語，好似「打車」等用語，每句結尾都會加「了呀」，光聽聲音好像與其他內地嘉賓融為一體，網友都大讚他：「真心說得不錯」、「會說普通話的香港人會特別加分的！」可能2014年起，黃宗澤開始往內地發展，普通話或多或少得到磨練。

除此之外，黃宗澤在節目算是無極限。他在天際100比其他嘉賓先得到線索，一臉得戚，還對鏡頭做了多個騎呢表情，好似放低了往日唱《Hey Boy》的偶像包袱。其後他要與羅志祥（小豬）在開蓬巴士上圍繞紅館開「巡迴演唱會」，雖然間中要冒雨進行，但他更是放開所有，要跳咩舞就跳咩舞，扮華仔OK，扮城城跳埋《對你愛不完》亦得，得咗。表情亦放大了十倍，更扮演人肉升降台，真是估他不到會如此放。到最後，真銀都不易搵，仲要做埋人肉輪盤。這些場面在香港應該好難見到，要寫個「服」字畀黃宗澤。