「何太」直播忽然爆喊　慶4個月記念日被斥假喊：最驚人哋同情我

月前《東張西望》連續報道76歲何伯閃婚細46歲內地女的忘年戀故事成為城中熱話，人氣急升的「新何太」不斷開直播，但同時亦不斷惹火頭Keep人氣！ 今日（13日），「新何太」在直播中突然七情上面，於鏡頭前爆喊，一邊抽泣亦不忘騷出何伯送給她的定情鑽戒和金戒子。而何伯就講道：「今日13號啦老婆， 4個月啦我同你，4個月啦知唔知呀？百日有多，我又冇錢而家，點解唔同我分手？唔會同我分手。好人唔係咁易搵，我就夠眼光，搵到呢個老婆對我咁好。唔好喊呀老婆，我哋做嘅嘢有天地知，行得正企得正。最衰啲壞人亂咁講嘢……」

而「新何太」就透露何伯的子女至今仍未聯絡他們：「老豆搵咗佢哋好多好多次，都冇睬佢，遺棄咗佢哋呢個老豆，我唔照顧佢唔得，所以我一定要照顧返佢。」何伯就稱心好甜：「多謝老婆，冇你照顧真係……今日見我唔到，老婆對我好好！」至於被網民留言稱其假喊，「新何太」就稱：「你哋話我假喊，我就更加會振作更加堅強，我最驚人哋同情我，起碼會喊幾十日。」