曾志偉重現經典《獎門人》召喚獎老回歸　網民嫌棄：老土當時興

無綫總經理曾志偉昨晚（14日）出席活動時透露下半年會有連串的綜藝節目大計，會配合香港回歸25周年、台慶55周年、香港小姐競選50周年、以及《超級無敵獎門人》25周年主題，詳情將會於5月26日舉行的節目巡禮中公布。

志偉表示：「我構思《獎門人》由7月做到11月台慶，會邀請元老級嘅獎老錢嘉樂、王祖藍、林曉峰、阮兆祥等回歸節目，亦會安排新人加入，都問過陳小春同金剛，一集都好吖！不過佢哋返唔到嚟！」志偉又希望獎品同遊戲都比以前更加犀利：「《獎門人》咁多年嚟總共玩過175個遊戲，依家正進行諮詢，研究緊咩遊戲會重現，亦會再創新遊戲。」然而有網民就開post討論志偉重推《獎門人》的計劃，不少網民都顯得相當嫌棄，甚至留言狠批表示：「當香港人智商仍停留喺廿年前？我小學時有睇，但到我做咗人父母嘅今日，我完全百份百唔會睇，除左教壞細路仲有乜？」、「老土當時興」、「當年已被人話係低智粗俗」、「又炒冷飯」、「應該改名叫《超級無敵老人家》？」