【翔揸劉灘】娛樂圈三大吹水王開棟篤笑　誓要取代黃子華

鄒凱光（灘叔）、彭浩翔及劉翁被喻為娛樂圈吹水王，三人今日（21日）聚在一起，宣佈一件大事，三子將會舉辦棟篤笑，名為《翔揸劉灘之潮潮的吹》。三人笑言：「呢個計劃想咗好耐，原本想搞上市公司，但發覺好大想頭，所以先舉辦棟篤笑，然後再上市啦，呢個第一步幾好，距離上市仲有一百步。」灘叔透露三人之中佢最有經驗，因為曾經做過棟篤笑，「今次目的算叫做導人向善，今次加埋佢兩個，咁會有比較，出嚟效果會知邊個表現出來係好笑啲。」

今次棟篤笑三人揚言打筋斗、載歌載舞、變魔術係冇嘅，純粹真係講笑話。至於話題係圍繞乜？劉翁搶先回答：「搵我一定係講壞男人，咁壞男人好多唔同層面，咁我會講講點先可以做成功嘅壞男人，亦會講下工作上遇到嘅騙案，變到成個Show係警訊。」而灘叔表示會討論兩性關係：「做咗咁多年男人，做過賤男，分享一下我做賤男嘅事，呼籲各位女性小心啲。」最後彭浩翔笑言自己冇補充，同佢哋講嘅差不多。

今次三人棟篤笑只開兩場，而三人圈內朋友十分多，會唔會大部份畀哂門票朋友？三人回應：「其實希望唔好請咁多圈內人，想畀多啲唔識我哋嘅人睇，因為只得兩場，得千幾個位，我哋想聽下街外人對我哋嘅反應，睇可唔可以成功會有下一次嘅Show。」三人台上發佈會時候笑言黃子華金盤啷口後，終於可以取代佢，訪問中問到呢一個問題，翔浩翔坦言：「其實我哋都好想佢繼續做，只不過宜家等到佢退休，我哋可以容易Book場，加上我哋做得差嘅話，佢可能會想復出打救呢個行業呢。」