胡定欣忽然奪「視后」感驚喜　透露台慶有重量級鉅製劇集

胡定欣今日（29/09）出席「元滿 75 齊心賀國慶」啟動禮。最近TVB在「2024亞洲影藝創意大獎」中橫掃10個獎項，胡定欣更獲封后。胡定欣接受《香港01》訪問時表示感到開心。她說：「唔知道公司攞咗我哋嘅劇集去提名，好驚喜。因為《破毒強人》係上年劇集，所以突然之間知道就有啲surprise。」

活動中胡定欣會上台唱歌，談到近況她就表示以練歌為主。她說：「劇集拍就未有，嚟緊《巾幗梟雄》應該都會係其中一套，而家都係準備緊宣傳安排。（練歌）多數係登台會用到嘅，而家就比較多時間可以練歌。今日會唱《至少還有你》、《終身美麗》、莫文蔚《The Way You Make Me Feel》。」

講到藝人揀登台歌，原來都大有學問。胡定欣受訪時就表示喜歡向難度挑戰。她說：「雖然唔係歌手，但係我自己就有要求，我鍾意向難度挑戰。意思係會鍛鍊自己，再唱好啲。因為始終自己鍾意。（一首歌要練幾耐？）冇㗎，總之上堂會練，平時又會練。（沖涼會唱？）一定啦，我諗每個鍾意唱歌嘅人都會。」