【屍殺帝國】直撃玄彬張東健新加坡谷新片　戲內互片戲外勁Friend

兩大韓國男神玄彬與張東健今日殺到新加坡宣傳新片《屍殺帝國》，下午與導演金星勳齊齊現身記者會，吸引大批媒體到場採訪。
玄彬與張東健分別於戲中飾演世子及朝廷高官，屬打餐死的對立關係，不過戲外二人原來是相識多年的好兄弟，今次首度合作擦出不少火花，玄彬仲形容張東健是他的避風港，發生咩事都有呢位大佬照住。

玄彬與張東健分別以灰色及黑色西裝現身，魅力十足，難怪導演金星勳被問到為兩位男主角設計造型時有什麼困難，他笑言二人生得太靚仔，任何造型都可以駕馭，就算成身污糟邋遢仍無損美貌。甚少拍古裝片的張東健就話，廿幾歲時曾演過一部歷史劇，當時穿上古裝被嫌唔合襯，所以今次拍《屍殺帝國》試造型時都好緊張，事隔多年再著上古裝，就發現原來幾好睇。

更多記者會現場照片（陳穎思攝）

電影中兩位主角屬敵對關係，張東健飾演對王位野心勃勃的高官，借喪屍謀反自立為王，而飾演世子的玄彬受亡兄之請求回國照顧嫂嫂，得悉張東健的計劃後，決定拚命對付喪屍，粉碎對方的陰謀。兩個角色都有相當大發揮，問到會否想交換角色演出，張東健立即耍手擰頭：「我後生10年的話可能會考慮」，他覺得玄彬的角色太辛苦，不單要同喪屍打餐死，仲要忍受嚴寒天氣，。而玄彬就話想一試張東健穿龍袍的戲份。

更多精彩劇照

今次新加坡宣傳之旅相當緊密，導演與兩位主角於晚上7時出席商場的紅地氈活動，結束後再趕去聖淘沙參與首映禮，再入戲院與觀眾見面。更多活動詳情，請留意《香港01》的新加坡直擊報導。