【美女廚房】美味天使藍莓變拉丁舞高手　劉俐：想做穩定工作

新一輯《美女廚房》早前就已經拍畢最後一集，3位主持以及一班「美女學徒」更在IG上貼文表達依依不捨的心情。話說回來，提到《美女廚房》就梗係要講當時節目中的6位「美味天使」：劉俐（藍莓）、陳蕊蕊（柑桔）、王淑玲（香蕉）、丁樂鍶（腸粉）、王寶寶（春卷）、梁懿晴（豆沙包）。當年6位真的是堪稱是宅男界女神，更是不少男性朝思夢想的對象。《美女廚房》第二輯已經結束了9年，雖然6位「美味天使」中還有幾位留在娛樂發展，但某些已遠離娛樂圈另覓出路，「美味天使」中的劉俐（藍莓）就其中一個例子。

「美味天使」藍莓已是9年前的名字

劉俐（藍莓）最近在舞蹈界發展的相當不錯，不時參加一些公開的拉丁舞比賽。據知在今年6月份，藍莓更以6人小組方式去了深圳參加公開賽。除此之外，她更有受邀出席舞蹈表現。現時正在澳洲放假旅行的藍莓接受《香港01》訪問，她說：「拉丁舞都只係興趣，大約學咗兩年左右。（拉丁舞比賽有攞過獎?）有㗎，但有時我果組比賽項目唔多人參加，拎咗獎都唔啲值得炫耀嘅事，等我學多十年勁啲再講啦。」問到最近的工作動向，她說：「之前喺時裝批發返Customer Services做咗年幾，旅行前啱啱辭職，當然我都想試下其它工作種類學嘢。其實宜家想Keep住做穩定實質嘅工作，始終圈外工作穩定啲，一定要搵 ，不過間唔中有幕前嘅嘢可以幫補家計都好開心啦。（放完假之後，圈外工作有冇話搵邊類？）其實我個人比較怕醜，唔敢主動搵，上次份工都係上網search 全職網搵。」

藍莓4年前不獲TVB續約，淡出娛圈

談及轉行淡出娛樂圈的原因，劉俐（藍莓）說：「嗰陣2014年完約公司（TVB）無傾續約，有其它合作最後都傾唔岩。喺香港Hea咗半年去咗上海一年做親戚間公司做零件做下打雜 包裝等等，之後又返黎香港，其實都有Keep住嘗試做唔同既工作。我仲記得第一次喺信和返工，要介紹護膚品產品畀客時，係緊張到面紅口窒，之後好快適應到，所以萬事起頭難。只要肯學慢慢累積經驗，每一份工都有佢嘅成功感。當然我都深深感受到每一份工都唔易做，好彩嘅係之前遇到既上司都好Nice。」

由宅男女神變成普通上班族

2014年後，藍莓決定遠離香港到上海生活打工，再之後回港工作，其實都有一段適應期。她坦言初次以售貨員面對群眾時也會尷尬、面紅口窒。「開始嘅時候會失落同唔慣，好在屋企人俾好大精神嘅支持，同埋我keep住同自己講一切都是上天最好的安排。冇人可以改變過去，做人應該要努力成為更好嘅自己，唔一定要物質上嘅富有，而係你嘅思想、精神上富有而每日又有進步。」

做回自己就是最開心放鬆

回顧以往娛樂圈五光十色、紙醉金迷的生活，再從中淡出，藍莓似乎更享受現在生活。「坦白講，我反而覺得依家嘅我係最開心同放鬆自在，以前會好拘謹唔知點做返真正既自己，會好介意人地嘅眼光，但其實根本無人會在意。依家簡簡單單先係應該過嘅日子。我亦都唔覺以前做藝人係特別巴閉，除非真係有才華人品好嘅先值得尊重。」比起娛樂圈，藍莓更喜愛現在做普通工作，閒時到舞室學拉丁舞的生活。

美味天使藍莓（劉俐）舊照：

劉俐近照：