名嘴Jimmy Kimmel街訪美國人　圖書管理員都講唔出一個書名？

回想一下，你有幾耐冇喺香港見到人睇書或者睇報紙，搭地鐵同巴士個個都做「低頭族」。早前民政事務局公佈2017年圖書館借書排行榜，其中小說類嘅書籍，頭10位有8本都係旅遊書。睇完呢個數據，可能覺得呢樣野只係發生喺香港，以為外國文化水平會高啲啦，點知都係差唔多。

主持過兩屆奧斯卡同艾美獎嘅美國名嘴Jimmy Kimmel所主持嘅清談節目《Jimmy Kimmel Live》，以幽默嘅角度探討唔同社會議題，令觀眾反思不同現象而紅爆全球。日前Jimmy Kimmel於節目內提到，根據美國民調機構皮尤研究中心﹝Pew Research Center﹞調查顯示每四個美國人入面就有一個喺過去一年內冇睇過一本書，所以Jimmy Kimmel派咗一team人出去進行街訪《Can You Name a Book?》，結果令人哭笑不得。

片段入面訪問咗12位途人，被問到可否講出一個書名嘅時候，個個都口窒窒，諗咗好耐都講唔出一個書名。其中一個最好笑嘅，竟然有一位圖書管理員日日連一本書名都講唔出，佢自己都尷尬自嘲：「而家我要失業喇。」另外，有趣嘅係，問到究竟對上一次睇書係幾時，有4位就話係美國著名童話故事書作家Dr. Seuss嘅作品，亦有人話已經12年冇睇過書。