【向西聞記】張建聲首度回應分手事件　「講到有小三介入我好嬲」

今日張建聲為網劇《向西聞記－咖哩雞》進行拍攝，亦都係佢分手後首度會見傳媒。問到最近一連串負面新聞會唔會影響工作心情，張建聲直言：「絕對有影響，但我唔會俾呢啲負面新聞影響我演出，因為我係專業嘅，我收得人哋錢，人哋俾得呢個機會我，覺得我合適演呢個角色，我唔可以俾呢啲負面心情影響我，但講真，我嬲嘅，因為我已經喺ig出咗一個聲明講分開咗，但我唔明點解仲會有咁多間傳媒有不實報導，例如話有小三等，令到我同Kelly要再出多一個聲明，澄清我哋之間係冇小三介入。」

張建聲更稱中間一直有好多自稱報料者爆料俾大家知分手內幕，張建聲都知道有呢一班人嘅存在：「我稱呢一班人為無聊人，佢哋咁樣影響雙方嘅形象，連累咗琳琳同松岡李那呀，見到呢兩個報導自己真係嬲。」

除咗怕影響到女方形像之外，自己形像難道就唔會怕？張建聲回答：「我都怕㗎，入行7年自己都冇乜緋聞傳出，今次一嚟就俾鋪大嘅我，有心理陰影㗎。不過唔緊要啦，眼睛雪亮嘅觀眾唔會因為呢件事去誤會我。」最後張建聲都好多謝老闆蕭定一支持和信任佢。