港媽博仔女入名校CAMP 日本細路帶住實驗放暑假
朋友暑假帶兩個o靚仔去 Orlando 迪士尼，玩咗 10 日，坐埋 cruise，使咗 50 萬港幣，仲貴過 honey moon 嗰陣。抵唔抵？人各有志啦。
又有朋友係四分一華人，生出嚟嘅小朋友就變咗八分一華人血統，暑假 no pay leave 兩個月，陪對仔女由美國去台灣學中文，private tutor。點解唔去北京，順便上埋兒童國情班？朋友話鍾意台灣啲 accent 多啲。
留喺香港嘅，一樣瘋狂。
朋友好擔心今年 Harrow 唔開 summer camp。
「學咩？」我問阿媽。
「唔知。」阿媽回答。
唔知學咩都超想報，反正重點係 Harrow 個名，唔係個 camp 嘅內容。畀唔起七位數字學費，暑假去沾下貴氣，寫落 portfolio 都好。
Harrow 贏晒。喺香港，興趣班幾貴都唔係新聞， 永遠高處未算高。
日本興嘅係：夏休み自由研究。
日本暑假興趣班 200 零蚊港幣有交易，都幾抵，但日本小朋友暑假一定做嘅，係一種叫自由研究嘅暑期功課，昭和年代已經有，為咗反填鴨同鼓勵小朋友發展自己嘅興趣，天文地理咩都得。
自由研究係日本阿媽嘅惡夢，暑假日日花盡腦汁煮午餐，仲要將小朋友天馬行空嘅題目變成實驗。
有o靚仔放啲螞蟻同泥入透明樽度，睇佢地點築巢，每日紀錄變化。
又有o靚仔以白堊紀既化石為題目，跟住專業嘅研究員，去到北海道既深山裏面，終於執到貝類菊石亞綱。三年班咋。
最流行嘅係香蕉會唔會曬黑實驗。有晒 hypothesis，但唔駛 power point，唔似香港錢多就贏晒。
攞兩隻香蕉，一隻喺太陽下面曬，一隻係光管下面曬，香蕉中間包上兩層紙，睇下曬黑出斑點嘅程度有咩唔同。
之後，再試下搽咗防曬嘅香蕉，會唔會冇咁易曬黑。而局部包住香蕉嘅紙，都可以換成唔同顏色同唔同質地嘅紙，睇下邊種保護得最好。
日本小一學生嘅暑期功課，好玩又有意義，連佢阿媽以至各年齡層嘅女人都會想知實驗結果。
有人做過統計，亞洲攞諾貝爾獎最多嘅國家係日本，一共有 24 位，仲話日本人係科學研究上咁有成就，都係靠自由研究呢個暑期習作，由細啟發小朋友。
其實唔使好勁，我見到有個o靚仔用一個月，畫咗幅超級迷宮，等老師拆解；港媽會覺得佢超級無聊，但我就好佩服佢有咁嘅耐力同心機。唔駛考試又唔計分喎，被港媽訓練到超功利嘅小朋友，早就睬佢都傻啦。
最緊要係ｏ靚仔樂在其中。
暑假，日日 30 幾度，仲去英國騎術學校騎咩馬，俾個o靚仔抖下啦。
（本文純屬作者意見，不代表香港01立場。）