自學語言總是三分鐘熱度？一個理由讓你堅持學下去
不想輕言放棄，首先你要有一個不會令你放棄的理由…實不相瞞，我當初學日文，是因為想跟因《Last Friends》爆紅的上野樹里傾偈。
老老實實，香港地一早沒有「朝九晚五」這支歌仔唱，放工都成七八點，點解無啦啦想學種新語言呢？如果你的答案由「無㗎」開始，我想在你亂揀一本閒閒地都要過百蚊的課本前，都真係可以再諗諗先喎。
不是說無心插柳不行，但你無心插柳得來要「有時間」囉。話就話時間跟乳溝一樣，但開始學習不久，你自然會發覺動機的重要性，在此分享數個事例。
1. 為埋堆
有個朋友在法資公司工作，身邊九成九都是法國人，雖然平時工作都可以英語溝通，但當他們細聲講大聲笑的時候，佢因為「想笑埋一份」而開始學法文。要笑埋一份其實有一定難度；大佬啊，英文笑話我地都未必識笑啦，何況是法文？但因為語言障礙而埋唔到堆，灰機同努力學好法文之間佢揀咗後者，雖然仲未可以笑埋一份，但進步神速。
2. 為飲飲食食
一個以前在法國文化協會的同學，說她只是因為喜歡「食好嘢飲靚酒」而開始學習，由於無酒無肉不歡，所以儘管她法文麻麻，所有關於飲食的詞彙都難不到她，可幻想她去到波爾多酒莊買酒，甩甩咳咳得來都綽綽有餘。
3. 為偶像
實不相瞞，我當初學日文，是因為想跟因《Last Friends》爆紅的上野樹里傾偈。「瑠可」呢個角色當年俘虜了不少少女心，而我又是那種一愛上便不能自拔的變態仔，雖然要去到傾偈這個level同打大佬無異，學習中途又屢有上野擺款串爆前輩的負面新聞，但總算有這個目標撐住我，而家同佢吹足一晚水都仲得（但首先我要識佢嘛，明嘅）。
以上三個動機，出於三個個人素願，學習的助力均來自一個強大誘因，望住目標才出發，也知道學到哪裏可以收手。反觀很多半途而廢的學習者，就是因為找不到「那個目標」，最後不了了之，要重學也不知道從何入手。
有個好友正是這樣，日文學到舊制三級1，丟下一段時間重頭再學，湊腳連同我及幾個朋友跟私人老師學日文，但由於他太忙，同時缺乏一個切實目標，漸漸少來上堂，像置身槍林彈雨的戰場，戰友倒下一個又一個，不出數月只剩下我。他近年也多番提起重學日文，我跟他說若然真的找不到一個非學不可的理由，最少也要訂立一個短期內可達成的目標，例如三個月內學會講價、點菜，起碼去旅行時可以學以致用。
目標達成自我感覺固然良好，即使離目標還差一大截，但你有目標，總起碼知道自己點解學、學緊乜、爭幾多，諗清諗楚再決定會否學下去也未遲。不想輕言放棄，首先你要有一個不會令你放棄的理由，唔係真係肥媽嗰句──嘥氣。
【註1】現時的日本語能力考試，由高至低程度，分為N1至N5級。舊制3級合格，等如現時N4級合格，被視為擁有初級日語能力。
（本文純屬作者意見，不代表香港01立場。）