【《巾幗3》重口味】離巢胡杏兒連環被姦　宣傳片扮谷阿莫自嘲　

李添勝監製的《巾幗梟雄》系列有口皆碑，而千呼萬喚的第三集《巾幗梟雄之諜血長天》今個月終於有得播，不過未知是否因為有傳《巾幗3》的劇情超越電視尺度，還是無綫想借助《巾幗》硬Sell自家收費網絡平台myTV SUPER，無綫竟然將劇集安排於myTV SUPER播映，《巾幗》系列粉絲想睇就要乖乖付錢。

《巾幗3》除了播映渠道有別於一般電視劇，就連官方宣傳片也刻意玩創新，學足台灣網絡紅人谷阿莫「X分鐘看完某某電影」的風格，利用啜核抵死的旁白快速口述《巾幗3》的劇情。旁白：「為滿足觀眾愈來愈重嘅口味，擺脫大家對電視劇等於師奶劇嘅印象，今次大台突破框框落足鹽花，挑戰入屋尺度，集殺人、被人殺、咬爆唇、強姦於一身，仲唔夠？再嚟殺人、強姦、姦完再姦，問你怕未？」無綫罕有地用上「大台」及「師奶劇」等字眼自嘲，莫非想撇甩「方丈」之名？

不過《巾幗3》這條誠實預告片的確幾誠實，劇情亦如旁白所言勁重口味，短短兩分半鐘的片段，已經有不少殺人場面，但最重口味的當然是已經離巢的胡杏兒連環被姦。劇中她先被日本人強姦，再被林盛斌飾演的日本軍人強姦，就連蕭正楠都打算向杏兒埋手再強姦多次，最後卻被杏兒咬唇反擊：「就算要我死，我都唔會再畀你毀我名節。」對於劇集突然轉玩重口味，有網民留言表示：「有強姦即係意識不良，我會去廣管局投訴。」、「除咗炒冷飯仲要沾污舊作」。